Frits Faosse is neet mièr, ózzen atletiek-miljoenaer haet ós verlaote. Óntelbare kière fietsde Frits nao ut Saorbrook, nao d’n Berg en nao Vrijenbroek. Noeits um op zien kónt te gaon zitte, altièd um zich ut schómpes te werke um zien jónges en zien maedjes te laote atletieke. Dae in ós sport de naam van Frits Faosse neet kint, dae haet de letste 75 jaor ónder unne stein gelaef.
Weej atlete hebbe vuùl respek, zièn gruuets en danke ózze Frits
Faosse. Ut bestuur woel um waal ens aan de kant schuùve, maar zien jónges goven
um allemaol eur veurkeurstum. Atletiek duis se toch neet met de moèl maar met
de hendjes en met dien hert. Frits waas ózzen trainer, ózzen allerbeste starter,
ózze vertrouwespersoeën, ózze materiale- en klusjesman. Frits waas ózzen alles
op ut atletiekveld, ein laeve lank.
Ut kapitaal van ózzen atletiek-miljoenaer zal neet
verschummele. Zien jónges en maedjes loupe nog altièd rónd op ut veld. We zièn
allemaol hièl bedreuf maar ouk dankbaar tegelièk. We hebbe neet gewach tot nao
zienen doeëd met um te ière. Weej hebbe um veurgedrage as lid van verdeenste.
We hebbe ózze Frits altièd op hand gedrage. Same met Frits un pilske drinke nao
de wedstrijd dao genote weej van.
Frits is ech de raeje waorum atletiek altièd mien passie is
gebleve. Ein groeët veurbeeld, as actieve atleet, met de hand oèt de mouwe
staeke en zeker met de jeug bliève stimulere veur ós sport. Wie ik um de letste
kièr opzóch zoot hae dao in ziene stool, hae waas muùch, ut ging neet mièr, ut
waas op. En óngeluiflik maar ech waor! Hae droog ut shirt van Scopias en zien ièrste vraog waas:
‘Wie geit ut nog beej Scopias?’.
Ut geit good met Scopias, dien werk zit d’r op, de hebs dien
rös diek en döbbel verdeend. Vanmorge heb ik nog ónkroèd getrokke róndum de
slingerkoèi. Det deejs dich ouk altièd tösse-door. Ik heb dao beej un träönke
gelaote, aan dich gedóch en gans allein aafschièd van dich genaome.
Frits, oèt naam van al dien jónges en maedjes in de atletiek: un miljoen kièr dank.
