Ik zet mich
de hand in de ziej, en gaon d’r ens goôd veur staon. Jao, ik weit ut weer, de
veurdeur waas toen effe broën van kleur met zôn raar holtwerkske d’r in, met
twiëje opvallende holtere böl baove de good gepoetsde kopere breevebus. Ik weit
nog det ik aan ôzze pap vroog waorum die twiëje böl baove die breevebus zote? ‘Veul d’r maar ens aan met twiëje hand! Dan
kinne de minse zeen det d’r heej van Tietelèr woëne’, en dan begôs hae te
schatere van ut lache. Op de rechter-deurstiël zoot eine moeije kopere knoep, ôs
hoësbel. Nae nae, de môs d’r neet op douwe, maar veurzichtig aan trekke. Via
ein dräödje waas de knoep verbônde naor de gangk. Aan ein vaer zoot die schelle
bel, waor ôs mam altiëd van schrôk. Ônder die veurdeur loôg ein dônker iëzere roëster
met zôn rechte veerkentige spiële. Det dekde un gaat aaf, waor ut kleine
raempke naor de kelder zoot. Daor zote altiëd spinnewebbe veur. Ik doon de auge
dich en laup in gedachte achterum.
Naeve ôs
hoës leep un grintpaedje, rechs loog ut Liëweriksveldje. Op det paedje struijde
ôs mam met ut zeef de as van de kaolenhaard oët. Linksum kwaam se op de plaats,
gans aafgezatte met un einsteinsmoor. Linksachter taege de hoësmoor stônd ut
kaolehok met de neutjes-veer veur de winter. Ut hok waas koeterwaals aafgedek
met pappendek, de kôs d’r lekker baove op kroëpe met good oëtzich op ut
Liëweriksveldje. Op de plaats ware behalve de paort nog twiëje deure. De iërste
waas van de scheur, dao in waas eine groëte puinzooi. Ôzze pap dae kôs niks
weggoëije, en ôs mam bleef daor dan auk maar wiëselik weg. Veur mich waas die
scheur allein belangriëk umdet mien laerskes daor stônde en mien schöp. De
twiëjde deur ging met un gemetseld trepke naor de beejkeuke. De more ware
gebraoke wit en praoper in de kalk gezatte, de betônne vloer waas dônkerroëd
geverf. Door de beejkeuke môste weej naor ut huuske (WC) en ’s maondigs deej ôs
mam heej altiëd de was. ’s Zondigs stônd die al te weike en as ik ’s maondigs tösse
de middag thoës kwaam stônd det holtere mormel te dreije en daen dreejpoët de
was op en neer te schödde. En as ik um veer oor thoës kwaam oët schoel moch ik
mam waal ens helpe met wringe. Ônder mien groëte bewôndering dreijde ôs mam met
opgestruipte mouwe stevig aan dae slinger. Ik stook ‘veurzichtig hè jông’ aan d’n eine kant de was tösse die rolle, en
aan d’n andere kant veel de oëtgewrônge was in de groëte waseimer.
Via de
beejkeuke kwaams se auk in de keuke. Ik zeen ut nog veur mich. Links ut aanrech
met unne echte paolingstein met gewoën unne simpele kalde kraan met de leiding
op de moor. Heej woord ik tösse door in gewasse as ik weer ens smaerig thoës
kwaam. Rechs stônd ut brikette-gestaok leech-gael fornuues op zien veer gedreijde
sjieke puuetjes. De baovekant waas blank iëzer met ein paar kaokplekke, te
herkinne aan die iëzere konsentriese ringe. Naormate de kaetel groëter waas
woorte d’r van die ringe aafgehaold met de pook. Op de planke vloer loog van
det gael-greun zeil met daor euver haer ein cocosmat, die piën deej aan de
bloëte veut. In ut midde stônd de keuketaofel, waoraan lekker gesmikkeld woord.
Ôzze pap meus zich aaf en toe bukke veur de wasdräöd die in de keuke ware
gespanne um ‘s winters de was aan te druuege. ’s Zaoterdaags taege d’n aovend woord
de cocosmat opgerold en de tafel en steul aan de kant gezatte, want dan ginge
weej allemaol in de kuuep. De jôngste ut iërs en ôzze pap ut lets. Det waas idder
kiër spannend, want dan zote weej allemaol al schoën gewasse in de kamer te
gleuje, en we hoorte dan wie ôs mam ôzze pap de rök wasde.
Via de keuke
kwame we links in de hoëskamer, en rechs waas de deur naor de kelder. Det waas
maar unne liëge kelder waor ôzze pap zich altiëd d’n bums stoëtte. Achter taege
de kelderdeur hông dae opvallend verbôrge Oranjekalender. Want dae moch ôzze
pap neet zeen, umdet hae unne echte republikein waas. En ôs mam die waas erg
keuningsgezind en bestelde idder jaor eure eige Oranjekalender. In de kelder
stônd aetesgerei det keul meus bliëve. Ik kan mich nog die keulse pöt herinnere
met zoormoos en snipperbuuenkes. En auk de zôndigse soep waor ut vet op dreef,
de chocoladepudding met vanillesaus of de vanillepudding met chocoladesaus. In
d’n oorlog hebbe zich daor spannende taferele aafgespeuld, maar daoreuver later
unne kiër. Truuk naor baove.
Tösse die
twiëje deure waas net plaats veur de kôffiemeule. Zôn kekgael geval, waor
schuuens ‘Koffie’ op stônd en waor baove de kôffieboëne in meuste. En door
aan de slinger te dreije veel de gemale kôffie in ut glazere bekske wat d’r
ônder hông.
Van de hoëskamer
had ôs mam ein hiël gezellig nes gemak. Ut waas altiëd un gevech um ein goôd
plaetske op de canapee te bemachtige. Ut waas ein groëte liëge bank met ein
liëge rökleuning. Ôzze pap had ziene eige praos naeve de zwart geëmailleerde
haard met daorbaove de schouw, waorop zien raukgerei loog. As mam saoves klaor
waas met aafwasse, kwaam ze met de greune kôffiekan de kamer in, en die woord
op ut plaetje op d’n haard gezatte. Dan had ze eindelik rös en krope weej taege
eur aan wies det ôs de uigskes dichvele. De twiëje glaas-in-loëd
schuuefdeure naor de goôje kamer woorte
allein aope geschaove as d’r groët bezeuk kwaam. Maar auk zoot ôzze pap daor
met meniër pestoër of minse van de visclub die eur vergunning op kwame haole.
In de gangk
waas behalve de veurdeur, auk de twiëje deure naor de twiëje kamers, en ein
lange dônkerbroëne gerdiën veur de trap naor baove. Weej hadde unne hiële moëije
betegelde gangk. Op de trap naor baove loog unne iets zachtere cocos-luiper,
vasgemak met van die kopere roedes. Ein paar kiër per jaor ging dae luiper d’r
aaf en woorte de roedes weer blinkend gepoets. Op de kale trap kôs se dan goôd
zeen waor de luiper loog, want daor waas de trap neet geschilderd. Elke roeij
woord met twiëje auge vastgezatte aan de traptraej, en daorônder de luiper
vasgeklemp.
‘Naor bed naor bed zag duimelot . . .
‘, zag ôs mam en
weej strômpelde de trap op. Via d’n euverlaup naor ein van de dreej
slaopkamers. Auk daor loog kald zeil op de vloer met un roetserig
slaopkamermetje. Det weit ik nog goôd, want wie we weer ens aan ut kuite ware,
vloog mien aldste zuske de kamer op. ‘Noow
is ut gedaon’, hoord ik um zegge, en ik zoog um met metje en al ‘zjoefff’ ônder mien bed schuueve. Ut kôs
zich nog net vashalde aan de matras en keek mich verschrik op geliëke huuegte
aan. Ik had ut neet miër, maar kroop toch maar flot ônder de daekes um mich
kepot te lache. Want mien zuske had ut duudelik te huure auk neet miër, maar ech
neet van ut lache. Zoë aaf en toe kwaam ôs mam op de rand van ut bed zitte en
zông dan van die alderwetse smartlappe veur ôs. Later zông de Zangeres-Zônder-Naam
die auk, maar die zông lang neet zoewe moëij as ôs mam. Die ging d’r gans in
op, de traone lepe eur euver de wange. Weej ware doëdstil en knepe met beide
hendjes in de umgeslage rand van ut lake. ‘Nog
eine kiër mam’. ‘Niks d’r van, noow gôt ge slaope, welteruste’, we kregen
ein kusje, unne aai euver d’n bol en ik loog nog lang te dinke aan die dreuvige
liedjes. Ik heb nog ens de tekste opgezôch.
Op d’n
euverlaup stônd auk de pispot, veur as we ’s nachs hoëge noëdt hadde. Want we
hadde baove gen water en gen WC. Waal nog de zöldertrap! Ut trappe-gaat waas baovenaan
aafgedek met un loëk, des se umhoëg môs douwe um op de zölder te kômme. Det
waas altiëd spannend. As ut raegende en ik vervaelde mich dan ging ik waal ens op
struiptoch naor de zölder, met allemaol greij um in te schuueme. Noow dink ik,
waas ut d’r nog maar, misschien kôs ik dae alde zooi dan nog miër waardere. Ein
van de moëijste dinger waas toch waal det zwart kôffer, unne echte
kôffergrammofoon. Veurzichtig makde ik dae aop, pakde de slinger en dreijde de
vaer op. In d’n deksel zoot de luidspraeker en ein paar bakkeliete plate in un
leechbroëne hoes met ein gaat in ut midde. Dao kôs se laeze wao de plaat euver
ging. Ein plaat kan ik mich nog hiël goôd herinnere, ze hoot ‘Skookian’. Hiël veurzichtig lag ik die
plaat d’r op, nog veurzichtiger mikde ik die echte iëzere naold op de iërste
groef en haolde de hendel euver. Hiël traog starde hae op en begôs dan: ‘Skookian skookian, oehhhh far away in
Africa . . . happy happy Africa . . .’.
Ik doon de
auge weer aop en kiëk nog ens naor mien elderlik hoës, noow woëne d’r al hiël
lang andere minse en andere kinder in. Die bouwe daor noow eur eige
herinneringe op met eur elderlik hoës. Ik kôs d’r in ieder geval waal ein book
euver schriëve. Allein zal neet idderein det leuk vinde, zeker neet mien
twiëijde zuske.
Umdet ut auk
neet altiëd pais-en-vreej waas beej ôs thoës sloët ik aaf met un letste
herinnering. Mien twiëijde zuske waas nogal erg op zien uueterlik. Zoewe zoot
ik ens op unne goôje aovend in de keuke mien hoëswerk te make achter de
beddelakes, die te druuege hônge. Mien zuske stônd aan d’n andere kant veur ut
speegel baove de kraan zich weer ens op te tutte. Ik hoord um kuueme en
godverre, want vlooke kôs det auk verrekkes goôd. Ik spiensde tösse de lakes
door en zoog det ut ein jeugpuisje aan ut oëtdouwe waas.
‘Lök ut neet moppekop’, waas ut enige wat ik zag. Bin noow iërlik, bes waal ônschöldig. Maar de
lakes woorte wie d’n bliksem vlookend aan de kant geschaove. ‘Kôm ens heej, godverdommese . . .’, maar ik sprinde door de hoëskamer
de trap op en hèt achter mich aan. ‘Bliëf
staon rotzak, ik trek dich de haor . . ‘, maar ik stoof auk de zöldertrap
op, douwde in ein bewaeging ut loëk umhoëg. En net veur ziene moppekop leet ik
ut loëk dich valle en ging mich d’r baove op zitte. God, wat waas det vrouwmes kniens,
ôzze pap môs d’r oëtintelik aan te pas kômme. Nog waekelangk heufde ik maar effe
te kuche, te fluite of zoëmaar te bewaege . . . dan zag ut al:
‘Kiëk mam, hae duit ut weer . . .'.
‘Ik doon ech hiëlemaol gaar niks mam . . .
‘
‘Nou gedraag ôch ens allebei en kin
us wat miër vanein hebbe . . .’, zag ôs mam dan.