Eín Europa, bieba Espanja

Weej zièn zón veer maond dakloos umdet we ós hoès verkoch hebbe en nag neet in ós appartement in Blièrick kinne. We zitte d’r neet mei, want sportvrinde van ós wiste nag un leuk huuske in Benijófar (Zuid Spanje). Noow euverwintere weej waal dökker in Spanje, maar dan veur twieë maond op un camping. Dit jaor woène we in un prachtige röstige woènwièk met opvallend vuùl Ingelse, Duitse én Nederlandse gepensioneerde aldere stelle wie weej. En wie det geit, dan kump se waal ens aan de praot. En ik zal óch vertelle, de korte bóks veel mich geregeld op de schoon! Eín Europa!

Eine wis mich te vertelle det Spanje ut gezóndste land ter waereld waas. En die mich kinne, die weite det ik det metein gaon controlere. En verdomp, kièk maar ens nao ut ónderzeuk van Bloomberg (https://www.businessinsider.nl/gezondste-landen-wereld/). Ze hebbe ónder andere gekeke nao laevesverwachting, rouke, zwaorlièvigheid, sanitaire veurzieninge en schoeën water. In det rieke kump ós Nederland pas op de 15de plaats. Dao geit ózze Wullem met zien watermanagement!

Ut bliek ouk det vuùl gepensioneerde eur riejkeshuuske in Nederland verkoupe en zich heej un klein pelièske met zwumbedje koupe in ut zunke. Zoeë verdwiène hièl wat zoor verdeende spaarcentjes nao dit Zuid-Europees land! En die mièr as 183 daag per jaor heej woène, die laote zich ouk nag as ‘resident’ inschriève. En wat held det presiès in? Det is un hièl langk verhaol, maar ut schaelt waal minstens 300 euro in de maond extra in de portemenee. AOW en pensioen wuùrt bruto euvergemak, en de belasting in Spanje is un behuùrlik stök lièger. De verplichte Spaanse zörgverzekering (Seguridad Social) leet ónder de 100 euro per maond, zónder eige risico en inclusief alles (ouk d’n tandarts en gen apothekersbeejdrage). Ut is wiejer hièl verstendig um ouk d’n auto te laote umzette, want waegebelasting is heej maar veer tièntjes per jaor. En det tik allemaol lekker aan!

En dae van Rutte ós maar wiès make ‘det d’r genne cent mièr nao Zuid Europa geit’. Nouw, die 65-plussers regele det waal veur um. Die bringe ut d’r met de schörkèr haer! Met de schörkèr? Met ut vleegtuùg, d’n dieken auto, de camper of met de caravan. Un echte grièze golf trek op nao ut zuuje! En det zièn veurzichtig geschat un paar hónderd miljoen euro per jaor. Um met de wäörd van Wilders te spraeke: ‘Un ware grièze tsoenamie’. 
En die maar allemaol lölle euver eín Europa. Op d’n haerwaeg nag effe de letste kièr tenke ónder Mestreech veur 1,75 euro de liter. Wie wiejer we nao ut zuùje reje, woort dae allein maar goodkouper. Met as toppunt wie we nao 2000 kilomaeter Benijófar binnereeje: 
‘Uij span herres: heej kos de spriet 1,19 euro!!!’, kreide Marijke.
‘Det verschil is hièl wat mièr as ut kwartje van Kok!’, mómpelde ik. Wat doon die in Brussel eigelik, det kriège die noeits van ze laeve op eín lièn. Róndum Benijófar ligge pittoreske dörpkes as Rojales, Dolores, Torrevieja, Quesada, Guardamar en la Marina. En weer tösse die dörpkes in stik ut van de ‘urbanisaties’. Ganse woènwièke met haos dezelfde prachtige huùs met eur eige zwumbedje, winkelkes en restaurantjes. Gebouwd met steun van Europa! Weej hebbe un plekske gevónde in de ‘urbanisatie Benimar 1’. Gauw de kóffers oètlaje en ós nieje ónderkómme bewóndere.
‘We mótte waal ièrs baodschappe gaon doon’, zaet Marijke.
‘Maar ik verrek van d’n hónger, ièrs wat hasse!’, zeg ik.
We loupe un restaurantje binne wao de meiste grièze köpkes te vinde zièn en waere door ein vrintelikke Spaanse senorita nao un täöfelke veur twieë verweze. De mónd velt mich aop, ut ‘menu del dia’ kos heej 9,80 euro! We hebbe zelfs de keus oèt vièf veurgerechte, vièf houfgerechte en vièf toetjes. We kriège zónder te vraoge unnen telder slaaj tösse-ós-in gezatte en un mendje vers stokbroeëd. We bestelle twieë ‘bieno blankoos’ en zeuke wat lekkers oèt, gelökkig kint Marijke un bietje Spaans. En ik zal óch vertelle, ut waas toch un pertiej lekker. We sloète aaf met twieë ‘kaffee americano’ en un Spaans likeurtje (hièrba). De totale raekening is 19,60 euro!!
‘Óngeluiflik, beej ós ware we minstes dreej kièr zoeë vuùl kwièt’, zaet Marijke.
‘Dan kinne we heej dus dreej kièr zoeë dök oèt gaon aete’, raeken ik flot oèt.

We zitte noow twieë maond in Spanje, dus net op de helf. Un paar kièr in de waek gaon we traine op ut gigantische sportcomplex van Torrevieja. Efkes in de hal un kaertje trekke veur unnen euro en we meuge de gansen daag traine. Behalve die Russe, die hebben un gaat gevónde in de umheining, die kómme veur nop binne. Maar det is ózze ièr te nao, det doon weej neet. Zoeë metein plök ik mien eige appelesienke veur straks in ózzen haof. Maar ièrs gaon we te voot aete, we weite nag neet wao. Want ut is euveral good! En dan waarschienlik op ut strand op ózze slaopzak örges oètboèke. Gewoèn umdet ut kin heej in Europa. In Europa?? In Spanje zul se bedoele!! Ik bin begós met unnen breef te schriève nao Rutte en nao Tummermans. Vergaet toch det eín Europa, det kump d’r noeits van. Ik zeen van der Valk gen daagmenu servere veur un tieëntje, inclusief drank en alles. En die Spanjaarde zulle noeits van-ze-laeve beej van der Valk zes tieëntjes gaon neertelle. 

En laote ze ós noeits mièr wièsmake det d’r genne cent mièr nao Zuid-Europa geit. Die Spanjaarde hebbe ut good veur mekaar. Die óntvange ós 65-plussers met aope erm. We veule d’r ós hièl welkóm en ós euro’s zièn vuùl mièr waerd as in ós eige land. Huùrt ge ut Rutte nag zegge met zón oètgestreke gezich wie unnen boer dae tandpièn haet: 
‘Nederland is ut gaafste land van de hele wereld’. Det bin ik eigelik ouk waal met um ins, maar Spanje is ut beste en meis gezónde land van de ganse waereld volges Bloomberg. Laote we det veural zoeë halde, en drièf ut neet te wièd door in Brussel want anders volge d’r straks nao de Brexit nag mièr Exits in alfabetische volgorde. 
Marijke kump nao binne:
‘Jan, ik heb hónger, geis se met?’.
‘Zulle we det Indiaas restaurantje vandaag us probere?’.
Bieba Espanja . .