Aan de Klaagmoor
Op enne moeëjen daag in 't veurjaor is 't in de alde paerdskoel aan de klaagmoor (net vur de brök) lekker zitte. Onger op det benkske veult me in 't zunke de noordewink, dae nag 'n bietje fris is, neet. Oeëme Baerke, dae dao zit, bekiek zich 't gewemel op de Maas ens, de op- en aafvarende schepe, 't gerammel van de treine op de brök, de auto's van de Venlose have aaf ónger de brök op d'n holtschop van Van Gasselt aan. De zón blink in de roète van de Nedinsco. Hae vergeliek det gezich van noow met det doe drek nao d'n oorlog. 't Begint d'r wir op te stale. Drek nao d'n oorlog waas 't net, aste nao de Venlose kank keeks, ofste 'n ald wièf in de mónk keeks. 't Is toch werm. Oeëme Baerke wuurt d'r lui van. 't Rouke wuurt hae ouk al muùg en daorum stik hae zien pièp maar in de tes. Hae geit zich nag ens gemekkelik zitte, duit de ouge zoeë half toe en geit 'n bietje moetse. En zoeë langzaam zuùt hae allerhangde gezichte in zienen droum. Hae zuùt de Pruùse det pontonbrökske inein fiesternölle, met eur lang pionierschöppe make ze de opvaart gelièk. Zien alde kammeräöj van doe - die noow al wir vuuël op Haoreskempke (ut alde kerkhaof) ligge te röste en 't mótte stelle zónger de schaduw van de alde Sint-Antoniuskerk - zitte beej um te boume. Wet höbbe ze die Pruùse verwins, wet krege ze zwens van eur wie ze nag aan 't winne ware. De wins is de vader van de gedachte en haop duit laeve. Jaomer genóg hóbbe de meiste d'rvan zien straf neet mièr meuge belaeve. Det hei eur nag ens good gedaon. Wir zuùt oeëme Baerke anger gezichte, de alde paerdskoel met zien gate en koele, det ald Maeske met zien vaerpónt, d'n Tegelsewaeg met zien buim toet aan de Havestraot, zoeëwet zónger huùs.
De kieks wies aan Staeveshuuske[1]. Op d'n Hamel taegeneuver de Blièrickse kerk steit zo'n ronk gebouwke, woeëveur 't deende en wie 't hoot is hae vergaete, det zónne rare naam hei. Op de Maas taegeneuver de kerk lik 't puntje van de kuùper, ennen alde visser, hoeëgerop zoeëwet taege de pasterie de zielverkuiper van Peskes Graad en nag 'n bietje hoeëgerop dae van Peusen Toeën, enne schipper. De Maas is lieëg en hae en dao zuùt hae 'n eilendje of kezelköpke oètstaeke. Det waas vruujer alle scheepvaart, behalve det d’raaf en toe ens enne stoumboeët van P.J.Berger oèt de stad door voor. Det waas zónnen alde raderboeët, dae zoeëwet baove euver 't water voor en flinke golve makde. Wet rende hae vruujer, wie hae nag klein waas, altièd herd nao de wal, want door d'n oploupende golfslaag bleve d'rbeej 't truukloupe wal ens klein viskes achter. Hae zuùt nag mièr wet ziene bestevader um vertelde van de Maas in zienen tièd, zoeëwet 'n hóngerd jaor truuk. Doe waas de Maas bevaarbaar, teminste vur de platte kaole-ake oèt Luik. Die kaole woorte vuuël heej gelos, d'r loge doe huip van de paerdskoel toet aan de Nak, en per ker wiejer 't lank ingewerk. Die ake of spitsbekke woorte met paerd nao Luik gesleip, stroumaaf góng 't van zelf, dök nag vuuël te hel, want in de Maas zoot vruujer, vur de kanalisatie, aardig stroum in. De alde lièn-drièvers kóste dao aardig van vertelle. Van aafrasteringe heie ze doe genne las, puntdraod waas d'r nag neet, de waeg naeve de Maas mós aope bliève.
‘Toeëntje, Toeëntje, dink aan God.’ Maar Toeëntje hei zich aan enne stroèk gegrepe en reep truuk:
‘Dink aan dien moder, ik hald mich aan de wietse vas.’ Met de stoumbuuët en de spaorwaeg is det allemaol verdwene, maar de aafstammelinge van die werkers en kaolelossers, met schöp en schörker, laeve nag in Blièrick. Bestevader praotde dao van broeëd, spek en jenever. Dao waas d'r enne, Kónraad hoot hae, femièliename woorte neet genump, dae mós ens 's nachs op zó'n scheep wach halde. De schipper brach um vur d'n aovend wet proviand vur de nach, 'n roggebroeëd van ach pónk, 'n pónk bótter en enne liter sjebouw. Kónraad waakde toet twelf oor, sneej zich 'n paar snitjes, smaerde ze en oot 't broeëd op toet aan de naam, dae d'r midden op stóng, en preufde d'r enne gas dröpkes baovenop. Zoeë waakde hae door en wie de schipper 's morges um 'n oor of ach truukkwaam en zag:
‘Kónraad, zulle we maar ens 'n snitje aete?’, antwaordde Kónraad:
‘Ut broeëd is op.’
‘En de bótter?’ Kónraad, hièl druuëg, want hae zag noeëit vuuël:
‘Op.’
‘Den laot ós maar ens ennen borrel drinke’, zag de schipper.
‘Ouk op.’ Of dae schipper, det ware vuuël Wale, ouk van sakkerju gedaon haet en of hae Kónraad nag dökker haet laote wake?
Opens woort oeëme Baerke wakker, doordet um emus aansteet en weg ware die alde veterane: Gröbbes Lewie, Haores Pauw, Levrinse Koeëb[2], Lange Graten Doeërus, de schippersherberge en de kaolesjouwers. Hae zoog wir de lange sleipe van noow euver de Maas vare, huùrde 't klökske oèt de noeëdkerk en de Mariakerk aan d'n euverkank klimpe. Febrieke toète. 't Is middig! Hae staokde zich ièrs 'n piepke aan en góng doe nao moder. Smakelik aete!